მარტი 548
en

„საქართველო და შეერთებული შტატები. დიპლომატიური ურთიერთობის ისტორია“ – საიუბილეო გამოფენა ეროვნულ არქივში

„საქართველო და შეერთებული შტატები. დიპლომატიური ურთიერთობების ისტორია“ - საქართველოს იუსტიციის სამინისტროს ეროვნული არქივის საგამოფენო პავილიონში ორი ქვეყნის დიპლომატიური ურთიერთობის 30 წლის იუბილესადმი მიძღვნილი გამოფენა გაიხსნა.

ექსპოზიცია ასახავს საქართველოსა და აშშ-ის ურთიერთობას საქართველოს პირველი დემოკრატიული რესპუბლიკის პერიოდიდან დღემდე, წარმოაჩენს ორი ქვეყნის თანამშრომლობის ხანგრძლივ და მრავალფეროვან ისტორიას, ასევე ამ სახელმწიფოების სტრატეგიულ პარტნიორობას.

ღონისძიება საქართველოს ეროვნული არქივის გენერალურმა დირექტორმა თეონა იაშვილმა გახსნა. გამოფენის დამთვალიერებლებს სიტყვით მიმართეს იუსტიციის მინისტრის მოადგილე ბექა ძამაშვილმა, საგარეო საქმეთა მინისტრის მოადგილე ლაშა დარსალიამ, აშშ-ის ელჩმა საქართველოში კელი დეგნანმა, საქართველოში აშშ-ის საელჩოს კულტურის ატაშე კრისტოფერ ანდერსონმა.

გამოფენის გახსნაში მონაწილეობდა უსინათლოთა კავშირის კულტურის, განათლებისა და სპორტის ცენტრთან არსებული ანსამბლი „კრწანისი“, რომელმაც ქართული ფოლკლორული სიმღერები შეასრულა.

ღონისძიების ორგანიზატორები არიან საქართველოს ეროვნული არქივი და აშშ-ის საელჩო საქართველოში.

ექსპონატებს შორისაა საქართველოს ეროვნულ არქივში, საქართველოში აშშ-ის საელჩოში, საქართველოს საგარეო საქმეთა სამინისტროში, აშშ-ში საქართველოს საელჩოსა და სხვა ორგანიზაციებში დაცული ფოტოები და წერილობითი დოკუმენტები.

გამოფენა 2023 წლის იანვრის ბოლომდე გაგრძელდება.

დათვალიერება თავისუფალია.