დოდო აბაშიძის დაბადებიდან 100 წლის  იუბილეს აღსანიშნავად საქართველოს ეროვნული არქივის საგამოფენო პავილიონში გამოფენა „დოდო აბაშიძე - 100“ 2024 წლის 20 სექტემბერში გაიხსნა. დამთვალიერებელს 3 თვის განმავლობაში ჰქონდა  საშუალება, ექსპოზიციაზე ეხილა დოდო აბაშიძის თეატრალური და კინოროლების ამსახველი ფოტოები, მისი პორტრეტები და საოჯახში არქივში დაცული სურათები.

ქართული თეატრისა და კინოს მსახიობი დოდო (დავით) აბაშიძე ივანე აბაშიძისა და ნინო ანდრონიკაშვილის ოჯახში 1924 წელს დაიბადა. მისი მშობლები მსახიობები იყვნენ. ივანე აბაშიძე რეჟისორ სანდრო ახმეტელთან ერთად 1937 წლის რეპრესიებს შეეწირა.

რუსთაველის სახელობის თეატრალური ინსტიტუტის სამსახიობო ფაკულტეტის დასრულების შემდეგ, 1949 წელს, დოდო აბაშიძე გახდა შოთა რუსთაველის სახელობის სახელმწიფო აკადემიურ თეატრის დასის წევრი. თეატრში 7-წლიანი მოღვაწეობის განმავლობაში 20-ზე მეტ სპექტაკლში მონაწილეობდა. მათ შორისაა „პეპო“, „ოთარაანთ ქვრივი“ „რღვევა“, „ხევისბერი გოჩა“, „ყაჩაღები“.

1954 წლიდან იღებდნენ კინოში. მხატვრულ ფილმებში განსახიერებული აქვს 70-ზე მეტი როლი, მათ შორისაა: ბიჭიკო („ჭრიჭინა", 1954), აბდუშაჰილი („ბაში–აჩუკი“, 1956), უშანგი („მე ვიტყვი სიმართლეს", 1957), დღვირა („თეთრი ქარავანი“, 1963), ალუდა („ხევსურული ბალადა“, 1965), ომარ მარღანია („მაცი ხვიტია“, 1966), სოსანა („დიდი მწვანე ველი", 1967), ბაჩუა („ტარიელ გოლუა“, 1968), მამამზე ერისთავი („დიდოსტატის მარჯვენა“, 1969), ალექსანდრე („სინათლე ჩვენს ფანჯრებში", 1969), პოლიციის პრისტავი („ვერის უბნის მელოდიები", 1973), ნესტორ კალანდარიშვილი („ციმბირელი პაპა", 1973), იასონი („პირველი მერცხალი", 1975), პაპა გაბრიელი („მწვერვალი", 1976), ვარლამი („რაჭა, ჩემი სიყვარული", 1977), არქიფო სეთური („დათა თუთაშხია“, 1977), ყვარყვარე („ყვარყვარე", 1978), გიორგი („ფესვები", 1987) და სხვა.

რეჟისორ სერგო ფარაჯანოვთან ერთად გადაიღო ორი ფილმი: „ამბავი სურამის ციხისა" (1984), სადაც თავადაც ასრულებდა ოსმან აღას როლს და „აშიკ-ქერიბი“ (1984).

დოდო აბაშიძეს 1961 წელს საქართველოს სახალხო არტისტის წოდება მიენიჭა. მამაკაცის როლის საუკეთესო შესრულებისათვის მიღებული ჰქონდა საერთაშორისო ჯილდოები ფილმებისათვის „დიდი მწვანე ველი“, „სინათლე ჩვენს ფანჯრებში“ და „პირველი მერცხალი“.

დოდო აბაშიძე 1990 წელს გარდაიცვალა.  დაკრძალულია მწერალთა და საზოგადო მოღვაწეთა დიდუბის პანთეონში. 

გამოფენის კურატორი: თეა ქიმერიძე